Ғалихан Жантөреұлының есімі еліміздің білім беру тарихында айрықша орын алады. Ол 1951 жылдан бастап педагогикалық институтта қызмет етіп, Қазақстан тарихы пәнінен дәріс оқыған алғашқы педагогтардың бірі. Пәннің сол кездегі атауы – «Қазақ ССР-нің тарихы».
Оның ұлттық тарихи сананы қалыптастыруға қосқан үлесі зор: Жантурин тұтас бір буынды тәрбиелеп, олардың ел тарихына деген қызығушылығы мен құрметін арттырды.
Зиялы әрі ауқатты отбасынан шыққан ғалым кең дүниетанымымен, жоғары білімділігімен ерекшеленді. Қазақ, орыс және араб тілдерін еркін меңгерген. 1969 жылы докторлық диссертациясын сәтті қорғады.
2006 жылы, ғалымның 90 жылдық мерейтойына орай, педагогикалық институтта Ғалихан Жантуриннің атындағы аудитория ашылған болатын. Биыл ғалымның балалары аудиторияны жаңартып, жөндеу жұмыстарын жүргізіп, университетке заманауи интерактивті тақта сыйлады.
Конференция аясында ҚӨУ ректоры Сейтбек Қуанышбаев ғалымның балаларына алғыс хат табыстап, ғылыми мұраны сақтау мен насихаттауға қосқан үлестерін атап өтті.
Ғылыми бағдарлама пленарлық отырыс пен секциялық жұмыстардан тұрды. Қатысушылар Ғалихан Жантуриннің өмір жолы, педагогикалық және ғылыми қызметі туралы баяндап, барлығы 49 баяндама ұсынылды.
Конференция еліміздің жетекші жоғары оқу орындарының студенттері мен магистранттарын біріктірді. Олардың қатарында Л.Н. Гумилев атындағы Еуразия ұлттық университеті, Қ. Жұбанов атындағы Ақтөбе өңірлік университеті, С. Сейфуллин атындағы Қазақ аграрлық зерттеу университеті, сондай-ақ С. Мәуленов атындағы гимназия оқушылары бар.
Ғалымның ұлы Марат Жантурин үздік баяндамалардың авторларын естелік сыйлықтармен марапаттады.
