Ұлт ұстазы А.Байтұрсыновтың туғанына 150 жыл толуына орай А.Байтұрсынов атындағы Қостанай өңірлік университеті түрлі іс-шаралар өткізуде. Қоғам қайраткерінің мерейтойы тек Қазақстанда ғана емес, ЮНЕСКО көлемінде аталып өтпекші.
ҚӨУ-де 1998 жылы А. Байтұрсыновтың мұражайы ашылған болатын. Оған Ахаңның қолданған түрлі бұйымдары, жеке заттары, ұлт көсеміне қатысты құжаттардың көшірмелері қойылған. Мұражай жәдігерлерін университет оқытушыларынан құралған экспедиция жинақтады.
Ұлағатты ұстаз Ахмет Байтұрсынұлының мұрасы сақталған мұражайға оқу орны студенттерінен басқа облысымыздың мектеп оқушылары, түрлі мекеме қызметкерлері мен қала қонақтары экскурсияға келеді, ақынның өмірімен, еңбек жолымен танысады.
Жуырда А.Байтұрсыновтың мерейтойына орай Федоров ауданының Абай атындағы мектеп оқушылары, Қостанай қаласының С.Мауленов атындағы №24 мектеп-гимназиясының, №5, №6 мектептерінің, С.Баймағамбетов атындағы Аулиекөл мектебі оқушылары және Қостанай қаласының Өрт бөлімінің қызметкерлері мұражайға экскурсияға келді. Қонақтарға ұлт ұстазының өмірі туралы мұражайдың маманы Жанат Тюлюбаева баяндап берді.
