Baitursynuly University-де «Қазіргі журналистика және PR-дың өзекті мәселелері: әлеуметтік және техникалық трансформациялар аясындағы бұқаралық коммуникация» тақырыбында V Халықаралық ғылыми-тәжірибелік конференция өтті.
Іс-шара Байтұрсын Ілиястың 85 жылдық мерейтойына арналып, медиа саласындағы жетекші сарапшыларды, ғалымдарды, журналисттер мен Қазақстан, Ресей, Канада және Қытай елдерінің тәуелсіз сарапшыларын жинады.
Ұйымдастырушы – Қостанай өңірлік университетінің журналистика және коммуникациялық менеджмент кафедрасы.
- Бүгінгі іс-шара бізге тарихымызбен жақынырақ танысуға, әрі жерлесіміз - жазушы, ақын, журналист Ілияс Байтұрсынды тағы бір мәрте еске алуға мүмкіндік берді, – деді әлеуметтік-гуманитарлық ғылымдар факультетінің деканы Алибек ТАБУЛДЕНОВ. – Оның бастамасымен біздің университет қазіргі таңда Ахмет Байтұрсынұлының есімімен аталып отыр.
Қатысушылар медиалингвистикадағы мәдениетаралық диалог мәселелерін, юрислингвистикадағы коммуникацияны, БАҚ дидактикалық әлеуетін, деректі фильмді, жарнама мәтіндерінің ерекшеліктерін және басқа да өзекті тақырыптарды талқылады.
