Бүгін ҚӨУ университеті ерекше қонақтарға – абитуриенттерге толды! Білім ордамызға Меңдіқара ауданынан жоғары сынып оқушылары келді.
Сыйлы қонақтарымыз универдің ішкі өмірімен танысқысы келіп, жоо-ға қалай түсу керегін білуді және университеттің атмосферасын сезінуді көздеген.
Оқушыларға заманауи зертханалар, студенттердің жобалары, мұражайлар мен шығармашылық алаңдар таныстырылды.
Қонақтар қуана-қуана студенттермен сөйлесіп, көкейіндегі сұрақтарын қойды. Сондай-ақ, мини-ойындарға қатысып, ҚӨУ имидждік сыйлықтарын жеңіп алып, біз дайындаған тәттілерден дәм татты.
ҚӨУ-дегі барлық корпустарға жасалған экскурсиядағы ең әсерлі сәт – ветеринарлық корпус зертханасы.
Ондағы жұмсақ та сүйкімді қояндар мен теңіз шошқалары ешкімді бей-жай қалдырмады. Біреулері сипап, енді біреулері видеоға түсіріп, кейбірі тіптен: «Ветеринар болатын болдым!» – деп арман мамандықтарын тапты.
Қонақтарымызға ҚӨУ-дегі мамандықтар жайлы толық ақпарат берілді. Университетімізде жүзден астам оқу бағдарламасы бар, әркім өз талғамына сай мамандықты таба алады.
Оқушылар, енді, университет – жай оқу орны емес, қызық та жаңа әлем екенін түсінді. Келешекте сіздерді өз студенттеріміз ретінде қарсы алуды асыға күтеміз!











