22 сәуірде «Инновациялар панорамасы» бағдарламасы аясында Ө.Сұлтанғазин атындағы педагогикалық институтының «География-биология» ББ-сы «Жаратылыстану-ғылыми білім беру мәселелерін зерттеу» тақырыбында жұмыс берушілермен кездесу өткізді. Оған қала мен облыстың білім беру мекемелерінің оқытушылары, университеттің магистранттары мен студенттері қатысты.
Кездесу барысында элективті пәндер каталогы мәселесі талқыланды, модераторы – аға оқытушы, педагогикалық білім магистрі Гаухар Баубекова. Сондай-ақ, осы іс-шара аясында аға оқытушы, география магистрі Күнсұлу Омарованың модераторлығымен 2 курс магистранты Марат Жолдыбек «Мектеп географиясы курсында QGIS геоақпараттық платформасында статистикалық, картографиялық мәліметтерді пайдалану» тақырыбында шеберлік сыныбын өткізді. Ол «QGIS» геоақпараттық платформасындағы жұмыс форматымен, статистикалық деректерді көрсету үшін картографиялық өнімді құру принциптерімен, сондай-ақ Жерді қашықтықтан зондтау деректері мен оларды өңдеу нәтижелері негізінде цифрлық білім беру ресурстарын құрумен таныстырды. Мұндай мазмұндағы цифрлық білім беру ресурстары географиядан факультативтік және тереңдетілген сабақтарды өткізуге негіз бола алады.
Шақырылған қонақтар оқу нәтижелерін, элективті пәндер каталогын талқылауға белсене қатысты, сонымен қатар оқу жоспарына «Геоэкономика», «Геоэкология», «Геосаясат» пәндерін енгізу бойынша ұсыныстар жасады.
Барлық қатысушылар ұйымдастырушыларға мамандарды дайындау, кәсіби тәжірибе алмасу туралы түсінігімен бөлісу мүмкіндігі үшін алғыстарын білдірді.
