28-29 сәуірде Қазақ ұлттық аграрлық зерттеу университетінің базасында ауыл шаруашылығының бірнеше бағыттары бойынша студенттердің XIV республикалық пәндік олимпиадасы өтті. Ветеринарлық санитария бағыты бойынша олимпиадаға 5 жоғары оқу орнынан 5 команда (15 студент) қатысты. Сайысқан командалар қатарында А.Байтұрсынов атындағы Қостанай өңірлік университетінің командасы да болды. Пәндік олимпиадаға университеттен 3 студенттен артық адам қатыспайды.
Олимпиада екі кезең бойынша өтті. Бірінші кезеңде студенттер тестілеуден өтті, олар50 минут ішінде 30 сұраққа жауап беруі керек болды. Ең жоғарғы ұпай - 30.
Екінші кезеңде екі теориялық сұрақ пен екі зертханалық тапсырманы қамтитын жазбаша тапсырма орындалуы қажет. Бұл тапсырмаларға берілетін ең жоғарғы ұпай – 60 балл.
Сайыс қорытындысы бойынша студенттеріміз жүлделі орындарға ие болды. 2-орынға Айжан Бақытжан лайықты деп танылды, ал Досбол Зұлпыхарға 3-орын бұйырды. Ғылыми жетекшілері - ветеринария ғылымдарының магистрі, ветеринарлық санитария кафедрасының аға оқытушысы Сәния Тыштықбаева.
Олимпиада дәстүрлі оффлайн форматында қазақ және орыс тілдерінде өтті.
Студенттеріміз бен оқытушыларымызды жеңістерімен құттықтаймыз!
