Назарбаев зияткерлік мектебінде «Зерттеуге бір қадам – дамуға жүз қадам» атты 5-ші облыстық ғылыми-тәжірибелік конференциясы өтті, оған Қостанай облысының жалпы білім беретін және инновациялық мектептерінің оқушылары қатысты.
Конференция жұмысы 2 бөлімнен тұрды: пленарлық отырыс, секциялар бойынша жобаларды таныстыру. Пленарлық отырыста мектеп директоры Думан Сапақов, А.Байтұрсынов атындағы ҚӨУ қолданбалы биотехнология ғылыми-зерттеу институтының директоры Сәбит Қоқанов құттықтау сөз сөйледі. Сонымен қатар, түрлі деңгейдегі ғылыми жобалар байқауларының жеңімпаздары мен жүлдегерлері өз пікірлерімен, әсерлерімен бөлісті.
Секцияларда 13 бағыт бойынша 134 қатысушының 115 жобасы ұсынылды:
«Қазақ тілі мен әдебиеті», «Орыс тілі мен әдебиеті», «Ағылшын тілі», «Физика», «Математика», «Информатика», «Дүниежүзі тарихы және Қазақстан тарихы», «Химия», «Биология», «Қоршаған ортаны және адам денсаулығын қорғау», «Экономика», «Этномәдениеттану» және «Өлкетану». Конференцияда жаһандық мәселелер талқыланып, зерттеушілер өз тұжырымдары мен жаңалықтарының нәтижелерімен бөлісті.
Жас зерттеушілердің жұмыстарына А.Байтұрсынов атындағы Қостанай өңірлік университетінің ғалымдары сараптамалық баға берді. Конференцияға қатысушылар қазылар алқасын тәжірибелік маңызы бар қызықты, жан-жақты идеяларымен қуантты.
