Академиялық ұтқырлық бағдарламасы аясында ERASMUS+ «Management for Business Startup’s: 2025 Summer course» шетелде білім алу байқауының жеңімпазы анықталды! Baitursynuly University «Экономика» білім беру бағдарламасының 3-курс студенті Арина КРОУС жеңімпаз атанды.
Жазда Арина Витаутус Университетіне (Литва) аттанып, студенттерге арналған қарқынды бизнес-курстан өтеді. Бұл - кәсіпкерлік дағдыларды дамытып қана қоймай, баға жетпес халықаралық тәжірибе алуға мүмкіндік беретін ерекше бағдарлама.
- Витаутус Университетімен біздің оқу орнымыз арасында тығыз академиялық байланыс орнатылған: біз “Есеп және аудит” білім беру бағдарламасы бойынша қос дипломды бірлескен бағдарламаны жүзеге асырып келеміз, - деп атап өтті интернационалдандыру және академиялық ұтқырлық басқармасының басшысы Нагима МАНАСБАЕВА. - Аталған серіктестік аясында литвалық әріптестеріміз ERASMUS+ бағдарламасы бойынша жазғы мектепке қатысу үшін ҚӨУ студентіне бір грант бөлді.
Қатысушылар байқау негізінде іріктелді. Барлығы 8 студент өтініш берді. Тестілеу кезеңінде ең жоғары нәтиже көрсеткен Арина Кроус жеңімпаз атанды.
Жеңімпазды құттықтаймыз! Осы қарқыннан таймай, биік белестерді бағындыра беріңіз!
