Baitursynuly University халықаралық білім беру аренасында өз позициясын нығайта түсуде. Бүгін Түркияда жүрген ҚӨУ делегациясы Pamukkale University-мен екі бірдей ынтымақтастық туралы келісімге қол қойды.
Алғашқы меморандум академиялық ұтқырлыққа арналса, екіншісі Erasmus+ бағдарламасы аясындағы серіктестікке бағытталған.
ҚӨУ делегациясының құрамында әлеуметтік-тәрбие жұмыстары жөніндегі проректор Нұрлыхан Темірбеков, интернационалдандыру және академиялық ұтқырлық басқармасының басшысы Нагима Манасбаева, Ө.Сұлтанғазин атындағы Педагогикалық институттың директоры Кенжегүл Есіркепова және Қазақстан тарихы кафедрасының профессоры міндетін атқарушы Гаухар Балгабаева бар.
Ынтымақтастық туралы меморандумдар студенттер мен оқытушылар үшін академиялық ұтқырлық пен тағылымдамадан өту тұрғысынан жаңа мүмкіндіктерге жол ашады.
Айта кететін жайт, Pamukkale University – Түркияның жетекші көпсалалы жоғары оқу орындарының бірі. Ол 1992 жылы Денизли қаласында құрылған. Университет халықаралық байланыстарды дамытуға үлкен мән беріп, студенттер мен оқытушыларды алмастыру бағдарламаларын белсенді түрде іске асырып жүр.
