«Білім беру саласының үздік педагогы-2020» республикалық байқауының жеңімпаздарының есімдері белгілі болды. Жеңімпаздар қатарында А.Байтұрсынов атындағы Қостанай мемлекеттік университетінің қайта өңдеу технологиясы және стандарттау кафедрасының аға оқытушысы Анзор Саидов бар. Анзор Мұсаевич 1 дәрежелі дипломға ие болды.
Бұл байқау жыл сайын еліміздің білім беру ұйымдарының оқытушыларын қолдау, қоғамдағы мұғалімнің мәртебесін көтеру, кәсіби дамуды қолдау, мұғалімдердің шығармашылық әлеуеті мен инновациялық әдістерін қалыптастыру мақсатында өткізіліп келеді. Оған республикалық деңгейдегі жоғары оқу орындарының оқытушылары, колледждер мен мектеп мұғалімдері қатыса алады.
Еліміздің үздік мұғалімдерінің есімдері ең үздік мұғалімдер жинағына енеді, жинақтың тұсаукесері 2020 жылдың маусым айының соңына не шілде айының басына жоспарланған. Онда үздік мұғалімдердің өмірбаяны жинақталады. Жинақтың тұсаукесеріне жинаққа енетін «Білім беру саласының үздік педагогы-2020» байқауының барлық қатысушылары шақырылады.
Анзор Саидов оқытушылық қызметті жеке құзыреттілікті дамытумен ойдағыдай ұштастырып келеді. Оның 50-ден астам ғылыми еңбектері бар. Ол сондай-ақ «WorldSkills Kazakhstan 2019» республикалық кәсіби шеберлік конкурсының, «World of Science» халықаралық ғылыми-зерттеу жұмыстары конкурсының, республикалық және халықаралық пәндік олимпиадалардың жеңімпаздары мен жүлдегерлерін дайындады. Қазіргі уақытта «Баян-Сұлу» кондитерлік фабрикасымен бірге ҚР БҒМ-нің қолдауымен «Қазіргі заманғы кондитерлік фабрикада шоколад және шоколад өнімдерін өндіру» инновациялық оқу-құралын жасау жұмыстарын жүргізіп жатыр.
WorldSkills International халықаралық сертификатталған сарапшысы, «Кәсіпқор» КЕАҚ штаттан тыс жаттықтырушысы. «WorldSkills Kazakhstan 2020» бас ұлттық сарапшысы «Кондитерлік іс» құзыретінде, «Қостанай облысының жоғары білім беру саласындағы 5 жаңа тұлға» конкурсының лауреаты.
«Білім беру саласының үздік педагогы-2020» республикалық байқауының жеңімпазы атану – біздің оқытушылардың жоғары әлеуеті мен мәртебесін толық көрсететін лайықты жеңіс. Кәсіби қызметте одан әрі жеңістер мен жетістіктер тілейміз!
