Бүгін «Этносаралық қатынастар. Әр түрлі елдердегі проблемалық мәселелерді шешу» тақырыбындағы халықаралық ғылыми-практикалық конференция өтті. Іс-шара Әзірбайжан елінің Қазақстандағы Мәдениет күні аясында, сондай-ақ бауырлас елдің ұлт көсемі Гейдар Алиевтың 100-жылдығына орай ұйымдастырылды.
Конференция барысында екі елдің қарым-қатынасы, ғылыми, мәдени ынтымақтастығының болашағы туралы айтылды. Шара қонақтары – Әзірбайжан Республикасының Қазақстандағы төтенше және өкілетті елшісінің орынбасары Ровшан Кязимов, «Бірлік» Қостанай облысының әзірбайжан қауымы» қоғамдық бірлестігінің төрағасы Рафаил Гаджибалаев, Баку Славян университетінің Журналистика кафедрасының профессоры Шелале Гасанова және т.б.
Конференция барысында А.Байтұрсынов атындағы Қостанай өңірлік университеті мен Баку мемлекеттік университеті, Баку Славян университеті және Қостанай облысы Қазақстан халқы ассамблеясының ғылыми-сараптамалық тобы ғылым және білім саласындағы ынтымақтастық туралы меморандумға қол қойды. Аталмыш келісім бойынша екі елдің ғалымдары тәжірибе алмасады, дәріс оқиды, академиялық ұтқырлық шеңберінде студенттер мен оқытушылардың алмасуы, біліктілікті арттыру курстары, сонымен қатар онлайн курстар мен семинарлар, вебинарлар ұйымдастырылады.
