Осы күндері ректор Сейтбек Қуанышбаев бастаған А. Байтұрсынұлы атындағы Қостанай өңірлік университетінің делегациясы Оңтүстік Кореяда жүр.
Естеріңізге сала кетейік, қараша айының басында Оңтүстік Корея Dong –Eui университетінің өкілдері Қостанайға келіп, университетпен танысқан болатын. Сапар барысында университет президенті доктор Хан Су Уон (Dr. SooWhan han) және BAITURSYNULY University ректоры Сейтбек Қуанышбаев Қазақстанның машина жасау саласы үшін кадрлар даярлау саласындағы ынтымақтастық туралы меморандумға қол қойды.
Бүгін кездесу корей жағында өтіп жатыр.
Жоғары оқу орындарының басшылығы ынтымақтастық шарттарын егжей-тегжейлі талқылады. Шартқа сәйкес, жыл сайын 5 BU студенті Dong Eui university-де академиялық ұтқырлық бағдарламалары шеңберінде оқитын болады. Айтпақшы, бірінші топ Оңтүстік Кореяға 2024 жылдың наурыз айында барады. Бұл күндері делегация өкілдері «Машина жасау» білім беру бағдарламасы бойынша қос диплом бағдарламасын іске асыру үшін бакалавриат пен магистратураның білім беру бағдарламаларын салыстыру және синхрондау бойынша жұмыс істеуде.
Кездесу барысында Корей мәдениетін таратумен және корей тілін оқытумен айналысатын король Седжонг қорымен тағы бір меморандумға қол қойылды. Бұл келісім гранттық жобаларға қатысуға, сондай-ақ Baitursynuly UNIVERSITY базасында Корей білім беру орталығын ашуға мүмкіндік береді.
