Бүгін университетіміздің құрметті профессорларының бірі Лилия Вагановна Саркисян 70 жасқа толды. Профессорды мерейтойымен университет ректоры, оқу орны ұжымы, студенттер құттықтады.
Лилия Вагановна университеттегі оқытушылық қызметімен қатар қоғамдық істермен айналысады. Ол – Қостанай облысындағы Қазақстан халқы Ассамблеясының Аналар кеңесінің төрағасы, Қоғамдық келісім және ғылыми-сараптамалық кеңестердің мүшесі, өзінің кәсіби қызметінің тиісті бағыттары бойынша мектеп психологтары мен денсаулық сақтау ұйымдарының психологтарына арналған үздіксіз білім беру курстарының ұйымдастырушысы және оқытушысы. Сондай-ақ түрлі бағыттағы іс-шаралардың құрметті қонағы. Бүгін де көпке қадірлі оқытушыға жүрек жарды тілектер айтылды, сый-сияпаттар ұсынылды. ҚМУ ректоры Алма Дощанова профессор мейірімі мен шуағын жан-жағына шашып жүретінін, Лилия Вагановнамен сан қилы тақырыпта қызықты әңгімелесуге болатынын айтты.
