Осы Жаңа жылда Денисов ауданының Гришенка ауылындағы әрбір кішкентай тұрғынның үйіне ғажайып енгендей болды. Гришенка негізгі мектебінің физика пәнінің мұғалімі Степан ГАЛКИН мен Baitursynuly University студенті Полина ПЕТРОВАның ықпалымен барлық ауыл балалары Аяз ата мен Ақшақардан сыйлықтар алды.
Айта кетейік, Степан Галкин де біздің университетте оқыған. ҚӨУ-де 2022 жылы оқуын аяқтап, қазір мұғалім болып жұмыс істейді. Ал жақында тағы бір жаңа рөлді сомдады: ол сиқыршы болды.
- «Жаңа жылдық ғажайып» акциясын ұйымдастыру идеясы Полина екеумізге Жаңа жылға екі ай қалғанда келді, — дейді Степан Галкин. — Мен өзім іс-тәжірибе жүзінде қолданып жүрген мұғалімдерге арналған пайдалы құралдарды дайындап, әріптестеріме символикалық бағаға ұсындым. Жиналған қаражатқа ауыл балаларына сыйлық сатып алуды жөн көрдік. Балалардың нақты санын біліп, ешкімді сыйлықсыз қалдырмау үшін мен жергілікті әкімдікке жүгіндім.
Бұл ізгі бастама көптеген мұғалімдердің тарапынан қолдау тапты. Қажетті ақша тез жиналды. Жаңа жыл қарсаңында Степан мен Полина Аяз ата мен Ақшақардың киімін киіп, Гришенка ауылындағы әр үйді аралады. Кішкентай ауыл тұрғындарына көтеріңкі көңіл-күймен қатар, ғажайыпқа деген сенім сыйлады. Ал бұл шын мәнінде ең құнды сыйлық…
