Биыл ҰБТ алғаш рет жаңа жағдайда өтеді. Түлектер коронавирус індетіне байланысты енгізілген карантиннің қатаң талаптарын сақтауы тиіс
Қазақстанда ұлттық бірыңғай тестілеу 20 маусым мен 5 шілде аралығында өтеді, оған 130 мыңнан астам адам қатысады.
Түлектер қатаң санитарлық нормаларды сақтауы тиіс. ҰБТ-2020-ның жаңа талаптары:
аудиторияларда әлеуметтік ара қашықтықты сақтау және маска кию міндетті;
аудиториялар желдетіліп, ауаны зарарсыздандыруды қамтамасыз ету керек;
ҰБТ өткізу пунктеріне кіретін жерде дезинфекциялық тоннельдер мен тепловизорлар орнатылады.
ҰБТ 5 пән (3 міндетті және 2 бейіндік) бойынша қағаз жүзінде өткізіледі. Тест тапсырмаларының саны – 120. Ең жоғары балл – 140.
Шекті балл:
педагогикалық мамандықтарға түсу үшін – 70 балл;
ұлттық жоғары оқу орындарына немесе медициналық мамандықтарға – 65 балл;
агроөнеркәсіп кешені мамандықтарына – 60 балл;
қалған жоғары оқу орындарына – 50 балл.
Жаңашылдықтар:
Тұлғаның бет-әлпетін тану көмегімен (Face ID) сәйкестендіру;
Электрондық сертификат және білім беру грантын тағайындау туралы электрондық куәлік;
SAT, ACТ және IB халықаралық стандартталған тестерінің балдарын ҰБТ балына аудару;
Шектік балл жинамаған тұлғаларға ҰБТ қайтадан тапсыру мүмкіндігі беріледі;
ҰБТ барысында түсірілген бейнежазба сарапталады. Тест тапсырушылары тыйым салынған заттарды пайдаланғаны анықталған жағдайда ҰБТ нәтижесі де, тағайындалған білім беру гранты да күшін жояды. Сондай-ақ ҰБТ тапсыру орындарында калькулятор беріледі. Тестілеу уақыты 4 сағатты құрайтын болады.•
Тағы бір айта кетерлігі, осы жылы ұлттық бірыңғай тестілеуде 11-сыныптағы төртінші тоқсан бағдарламасының сұрақтары кездеспейді.
Оқушылар төртінші тоқсанды толығымен қашықтан оқығандықтан, оларға жеңілдік жасалып отыр.
