Astana Hub инновациялық жобаларды дамыту орталығы инженерлік және АКТ мамандықтарының студенттері, магистранттары мен докторанттары үшін Эрасмус+ жобасы шеңберінде жоспарланған «ЖОО-ның білім беру бағдарламаларында (UXiship) пәнаралық модульдік курстардың көмегімен стартаптарды дамыту бойынша АКТ мамандықтары студенттерінің құзыреттіліктерін жандандыру» курсын онлайн форматта өткізді.
Технологиялық кәсіпкерлік курсы (Startup Academy) бойынша оқыту бір апта бойы өтті. Қарқынды оқыту курсы стартаперлер мен болашақ өнім менеджерлерін IT-кәсіпкерлікпен таныстыруды көздеді.
Онлайн вебинарларға ақпараттық-коммуникациялық технологиялар және инженерлік білім беру бағдарламалары бойынша оқитын инженерлік-техникалық институттың студенттері, магистранттары мен докторанттары белсенді қатысты. Курсты аяқтаған барлық қатысушылар сертификаттарға ие болды.
Бұл курс студенттерге өздерінің іскерлік коммуникацияларын дамытуға, маркетинг негіздерін түсінуге, нарықты талдауға, бизнес-модельдеуге пайдалы.
