5 қыркүйекте Ахмет Байтұрсынов атындағы Қостанай өңірлік университетінде мемлекет қайраткері, лингвист ғалым, ағартушы, ақын, аудармашы, публицист, ұлттық жазудың реформаторы, қазақ тіл білімі мен әдебиеттанудың негізін қалаушы Ахмет Байтұрсыновтың туған күні атап өтілді. Ұлы ақынның есімі берілген оқу ордасында Ахаңның туған күні жыл сайын әр түрлі форматта тойланады. Осы жолы елімізде орын алған жағдайға байланысты университеттің жетекші профессорларының бірі, филология ғылымдарының докторы Алмасбек Әбсадықтың ұйымдастыруымен онлайн-ашық дәріс түрінде өтті. Іс-шараға Ш. Уәлиханов атындағы тарих және этнология институтының ғалымдары, Қазақстан Республикасы Білім және ғылым министрлігінің Ғылым комитеті, Алматыдағы Ахмет Байтұрсыновтың мемориалдық музейінің қызметкерлері, сондай-ақ Ахмет Байтұрсынов атындағы Қостанай өңірлік университетінің оқытушылары мен студенттері қатысты. Дәріс барысында ақынның 1933-1937 жылдары тұрған үйде орналасқан мұражайға онлайн-экскурсия өткізілді. Бір кездері халқы Ахаңның есімін де атай алмаған, бүгінде, шүкір, Ұлыларымызды ұлықтай алатын дәрежедеміз! Тәуелсіздік алғаннан кейін көшелерге, оқу орындарына Ахмет Байтұрсыновтың есімі беріле бастады, Алматыда, Қостанайда, Шымкентте ескерткіштер орнатылды.
