«2022 жылғы Жоғары оқу орнының үздік оқытушысы» конкурсының жеңімпаздары анықталды. Байқауға еліміздің 71 жоғары оқу орнынан барлығы 775 үміткер қатысты. Конкурстық комиссияның іріктеуі нәтижесінде Қазақстандық 43 ЖОО-ның 150 оқытушысы жеңімпаз атанды. Бұл қатарда А.Байтұрсынұлы атындағы Қостанай өңірлік университетінің оқытушылары да бар. Олар: Мектепке дейінгі және бастауыш білім беру кафедрасының қауымдастырылған профессоры, педагогика ғылымдарының кандидаты Назгүл Айдналиева, философия ғылымдарының докторы (PhD), Ветеринариялық медицина кафедрасының меңгерушісі Марат Әубәкіров, сондай-ақ В. Двуреченский атындағы ауыл шаруашылығы институтының директоры, ауыл шаруашылығы ғылымдарының кандидаты, Агрономия кафедрасының қауымдастырылған профессорының м.а. Алмабек Нұғманов.
Конкурста электронды оқу ресурстарын, оқу материалдарын әзірлеу және жариялау, отандық және халықаралық журналдардағы ғылыми жарияланымдар, өнертабысқа патенттердің болуы және т.б. сияқты көрсеткіштер, сондай - ақ үміткердің оқыту сапасы, оның бакалавриатта, магистратурада және докторантурада кадрлар даярлау жөніндегі еңбегі бағаланды.
Жеңімпаздардың әрқайсысы 2000 АЕК көлемінде сыйақы алатын болады, бұл шамамен 6 млн теңгені құрайды. Ақшалай ынталандырудан басқа «2022 жылғы Жоғары оқу орнының үздік оқытушысы» төсбелгісіне ие болады.
Жеңімпаздарды құттықтаймыз, еңбектеріңіз әрқаша елене берсін!
