Бүгін А.Байтұрсынов атындағы Қостанай өңірлік университетінде алғашқы саны жарық көрген жаңа «Univer Life» журналының тұсаукесері өтті.
«Univer Life» журналы - университеттің ғана емес, сонымен қатар аймақтың ең маңызды жаңалықтарын қамтитын университеттің жаңа имидждік жобасы.
Университеттің жаңа журналының шығуына оқу орнына өңірлік мәртебесінің берілуіне байланысты болып жатқан өзгерістер себеп болды. Журнал екі тілде жылына төрт рет шығады, сонымен қатар электрондық нұсқасы да болады. Басылымның авторлары – оқытушылар мен студенттер.
UniverLife əр түрлі институттар мен факультеттердің студенттерін байланыстырады жəне студент пен оқытушының, ректораттың арасын жақындатады.
Университет ректоры Алма Дощанова әр нөмірде өзекті тақырыптарды қамтитын «Ректор бағанын» жүргізетін болады. Бірінші нөмірде ректор журнал оқырмандарына: «Сіздердің əрқайсыларыңыз өз материалдарыңызды журнал беттерінен көре аласыздар, өміріңіздің ең жақсы сəттері, күдіктеріңіз, ізденістеріңіз бен ашқан жаңалықтарыңыз туралы айта аласыздар. Сіздердің пікірлеріңіз міндетті түрде ескеріледі.
Мен журналистика жəне коммуникация менеджменті факультетінің студенттеріне айрықша өтініш білдіремін. Сіздерде шығармашылық қабілеттеріңізді байқап көруге, тəжірибе жинақтауға, таңдаған мамандығыңызға алғашқы қадам жасауға тамаша мүмкіндік бар»,-деп, үндеу тастады.
Сонымен қатар Алма Іргебайқызы журналды шығаруда блогерлерді, иллюстраторларды, фотографтарды жəне белсенді шығармашыл оқытушылар мен студенттерді ынтымақтастыққа шақыратынын айтты.
Журналдың бірінші санында «Жас-Қанат 2006» құс фабрикасының директоры, А.Байтұрсынов атындағы ҚӨУ-нің түлегі Қайрат Маишевпен эксклюзивті сұхбатты оқи аласыз, айтпақшы ол Baitursynov University түлектер қауымдастығын басқарады. Сондай-ақ «X-Factor» телевизиялық жобасының 8 маусымының жеңімпаздары BRO дуэтімен сұхбатты да журналдың алғашқы санынан таба аласыздар.
