Жастар ресурстық орталығы дәстүрлі «Үздік волонтер» байқауының қорытындысын шығарды. Жеңімпаздар қатарында ҚӨУ-нің «Аялы жүрек» студенттік еріктілер клубының мүшелері, Ауыл шаруашылығы институтының 4 курс студенті Әділхан Серікбаев пен Инженерлік-техникалық институттың 1 курс студенті Елубай Жоламан бар. Олар дипломдармен және 100 000 теңге көлеміндегі ақшалай сыйлықпен марапатталды.
Байқаудың басты мақсаты – еріктілерді, еріктілер ұйымдарын, олардың жүзеге асырған жобаларын іріктеп, үздіктеріне алғыс айту, марапаттау. Жыл өткен сайын еріктілер қозғалысы жанданып, олардың қызметтері қоғамда кеңінен таралуда.
Жоламанның 4 жылдан астам волонтерлік тәжірибесі бар, Қостанайға келгенге дейін Жітіқара ауданындағы ерікті жасақтарды басқарып, ардагерлерге көмек көрсету, спортты дамыту, нашақорлықпен күресу мақсатында көптеген іс-шаралар ұйымдастырды.
Әділхан – «Аялы жүрек» еріктілер клубының төрағасы. 1 курстан бастап волонтерлік қызметпен айналысады. Әділхан бастаған клуб осы уақытқа дейін көптеген іс-шаралар, акциялар өткізді: қарттардың аулаларын қардан тазартты, еріктілерді медициналық көмек көрсету дағдыларына үйретті. Сондай-ақ 100-ден астам клуб мүшелері жануарларға, балаларға әлеуметтік көмек көрсетеді.
Жеңімпаз студенттерімізді құттықтаймыз! Жасап жатқан жақсылықтарыңыз өздеріңізге еселеп қайтсын!
