«Өнер» студиясының шәкірттері, ағасы мен қарындасынан құралған Жұмағановтар дуэті республикалық ән байқауының жеңімпазы атанды. Нұрсұлтан мен Гүлназ – экономика және құқық институтының студенттері. Олар вокалдың ұстазы Гүлсін Бейсенбаеваның жетекшілігімен «Мұрагер» шығармашылық орталығы Мұқағали Мақатевтың 90 жылдық мерей тойына орай ұйымдастырған «О, поэзия!» республикалық өнер байқауына қатысты. Сайыс қашықтықтан, онлайн форматта өтті.
Байқауға түрлі жанр бойынша (вокал, көркем сөз, шығарма, хореография, ақындық өнер, т.б.) 200-ден аса өнерпаз қатысты. Жұмағановтар дуэті М.Мақатаевтың «Есіңе мені алғайсың» әнін орындады.
Әншілерді білікті мәдениет мамандары мен санаты жоғары педагогтар бағалады. Байқаудың ережесі бойынша қатысушылар өтініш толтырып, өз өнерлерін видео түрінде жіберу керек болды. Қорытынды инстаграм желісінде жарияланды. Байқаудың нәтижесі бойынша Жұмағановтар дуэті «Вокал» номинациясы бойынша үздік деп танылды. Ал жетекшілері Гүлсін Бейсенбаева "Үздік ұстаз" атанды. Диплом мен медальдар почта арқылы жіберілді.
