11 қаңтардан бастап университет ұжымы мен оқытушылары арасында қысқы спартакиада өтті.
А.Байтұрсынов атындағы ҚӨУ-нің қызметкерлері мен оқытушыларының спартакиадасы жыл сайын спорттың 8 түрі бойынша өтеді. Биыл да әріптестеріміз футбол турнирі, волейбол, шахмат, дойбы, тоғыз құмалақ, шаңғымен жарыстан өзара бақ сынасты.
Жарыстың ұйымдастырушылары – спорттық-сауықтыру кешені, дене шынықтыру және спорт теориясы мен практикасы факультеті, А.Байтұрсынов атындағы ҚӨУ-нің кәсіподақ комитеті.
Мини-футболдан жарыста 1-орын Инженерлік-техникалық институтқа бұйырса, 2-ші және 3-ші орындарды Ауылшаруашылық институты мен Экономика және құқық институты өзара бөлісті. Ал 4-ші орында университет әкімшілігі. Волейболдан әйелдер арасындағы жарыста 1 орынды Инженерлік-техникалық институты жеңіп алды. 2 орын Қашықтықтан оқыту институтына, 3 орын Экономика және құқық институтына тиесілі. Спартакиаданың нәтижелері мен жеңімпаздар 20 қаңтарда анықталады, онда командалық нәтижелер шығарылады. Жеңімпаздар мақтау қағаздарымен және сыйлықтармен марапатталады. Мұндай жарыстар университет қызметкерлерінің арасында салауатты өмір салтын және спорттық рухты сақтау мақсатында жыл сайын өткізіледі.
