А.Байтұрсынов атындағы Қостанай өңірлік университеті талапкерлерді оқу орнына тарту, мектеп оқушыларына кәсіптік бағдар беру жұмыстарымен жыл бойы айналысады. ҚӨУ-нің қызметкерлері мен оқытушылары аудандар мен қала мектептерін аралап, университеттегі білім беру бағдарламалары, тәжірибеге бағытталған білім және академиялық ұтқырлық бағдарламалары, студенттердің жан-жақты жетілуі мақсатында құрылған түрлі бағыттағы клубтар, әскери кафедра туралы ақпарат береді. Кездесулер онлайн форматта да өтеді. Осындай кездесулердің бірі жуырда Амангелді ауданында өтті. Онлайн кездесу барысында П.Чужинов атындағы Экономика және құқық институтының директоры Әлібек Табылденов пен «Бухгалтерлік есеп және басқару» кафедрасының қауымдастырылған профессоры Елена Васильчук, «Психология» кафедрасының аға оқытушысы Нұргүл Әбәкірова Амангелді ауданының 11 сынып оқушыларына кәсіптік бағдар берді, университеттегі мүмкіндіктер жайында айтты.
Аталмыш институттың Экономика және қаржы кафедрасының профессоры Сансызбай Жиентаев өзінің туған жері, Феодоров ауданында болды. Экономика ғылымдарының докторы аудан оқушыларымен, мұғалімдермен, сондай-ақ мектеп түлектерінің ата-аналарымен кездесті, университеттегі ББ, гранттар мен жеңілдіктер туралы толық ақпарат берді.
