А.Байтұрсынов атындағы Қостанай өңірлік университетінің журналистика және коммуникациялық менеджмент кафедрасы мен жергілікті БАҚ редакцияларының арасында тығыз қарым-қатынас орнаған. 9 сәуір күні аталмыш мамандақтың студенттері мен облыстық «Қостанай таңы» газеті журналистерінің қатысуымен өткен дөңгелек үстел осы игі дәстүрдің жалғасы болды. «Қазақ зиялылары мен баспасөз» тақырыбындағы дөңгелек үстелге мамандықтың түлектері, өңірімізге танымал журналистер Әлібек Ибраев, Айтолқын Айқадамова және Шұға Қоңқабева қатысты.
Іс-шараны ұйымдастырушы кафедраның аға оқытушысы Гүлшат Марқабаева келген қонақтарды таныстыра отырып, студенттерге өздерін толғандырып жүрген сұрақтарын қоюға мүмкіндік туып отырғанын айтты. Кездесу барысында алғашқы болып сөз алған Әлібек Ибраев журналистикадағы тәжірибесімен бөлісіп, болашақ журналистерге өз кеңестерін берді.
Ал Шұға Қоңқабаева өз сөзін әріден бастап, 100 жылға тартам тарихы бар аймағымыздың ата газеті «Қостанай таңының» өткен жолына көз жүгіртіп, әр дәуірдегі қазақ зиялыларының баспасөзге қосқан үлесіне тоқталды. Тілші Айтолқын Айқадамова мамандықтың қыр-сырынан сыр шертіп, іс-тәжірибеде білген-түйгендерімен бөлісті.
Студенттер өздерін толғандырған сұрақтарға тұшымды жауап ала алды. Келелі отырыста болашақ маман иелерінің жұмысқа орналасуы мен іс-тәжірибеден өтуін қамтамасыз ету жолдары сөз етілді. Білікті тілшілер 1 курс студенттеріне сәттілік тілеп, тілекші екендерін білдірді. Дөңгелек үстелге қатысушы кафедра меңгерушісі Амангелді Шурентаев аталмыш кездесулер арқылы студенттер аз да болса тәжірбие жинап, өз мамандығына деген қызығушылық оянатынын тілге тиек ете отырып, қонақтарға алғысын білдірді.
