Наурыз – жыл басы, бейбітшілік пен көктем мерекесі. А.Айтмұхамбетов атындағы инженерлік-техникалық институты мен В.Двуреченский атындағы ауылшаруашылық институты бірігіп «Армысық, әз Наурыз» мерекелік концертін өткізді. Концерт аясында ұлттық спорт түрлерінен спорттық жарыстар және университетіміздің 2019 жылғы түлегі Жүнісбек Саржанға қолдау көрсету мақсатында «30 игі іс» ұранымен қайырымдылық жәрмеңкесі ұйымдастырылды. Қазіргі уақытта ол гемодиализде, бүйрек трансплантациясын қажет етеді.
Институт директорлары мен тәрбие ісі жөніндегі проректор Азамат Исабаевтың құттықтау сөздерінен кейін өнерпаз студенттер әсем ән шырқады, күмбірлете күй тартты, қазақ және түрік халық билерін биледі.
Концерттен кейін спорт залында асық ату, арқан тарту, қол күрес сияқты ұлттық спорт түрлерінен жарыстар өтті. Жеңімпаздар мақтау қағаздарымен және тәтті сыйлықтармен марапатталды.
