Мобильді фильмдер фестивалі өз ойын көпшілікке жеткізгісі келетін, айтары бар, талапты жастар үшін үлкен мүмкіндік. Фестивальға қатысам деушілер көп, қазірдің өзінде Қазақстанның түкпір-түкпірінен 150-ден астам өтінім келіп түскен. Ойындағысын бейне-таспа бетіне сәтті түсіре білген өнерпаздар үлкен кино әлеміне жолдама алады.
Жобаны ұйымдастырушылар Ахмет Байтұрсынов атындағы Қостанай өңірлік университетінің студенттерімен бірнеше кездесулер өткізді. Мобильді кинофестиваль жобасының жетекшісі Ербол Тәжібаев пен идея авторы, режиссер, продюсер және сценарист Фархат Серкебаев сұрақ-жауап форматында түсіндірме әңгіме өткізіп, алдағы перспективаларға тоқталды. Ал ең белсенді студенттер Қостанай өңірлік университетінің SMART-орталығының базасында өтетін фестивальдің жарнамалық промо-ролигіннің түсіріліміне шақырту алды.
Қонақтарға экскурсия жасалып, оқу орнының, студенттердің тыныс-тіршілігімен танысуға мүмкіндік туды. Кездесу барысында ҚӨУ-нің студенттері аталмыш жобаны жүзеге асыруға көмектескісі келетіндіктерін жеткізді, өз идеяларын ұсынды.
