Чужинов атындағы экономика және құқық институты кәсіптік бағдар беру жұмысы аясында ZOOM платформасында №3,№4 және №5 мектептерінің жоғары сынып оқушыларымен кездесу өткізді. Іс-шараға барлығы 100 оқушы қатысты. Кездесудің модераторы – директордың мансап және жұмыспен қамту жөніндегі орынбасары Елена Васильчук.
Институт директоры Әлібек Табылденов болашақ талапкерлерге институт құрылымы, қызметі, жүргізіліп жатқан ғылыми іс-шаралар, институт студенттерінің академиялық ұтқырлығы туралы ақпараттарды ұсынды.
«Журналистика» білім беру бағдарламасын студенттерге журналистика және коммуникациялық менеджмент кафедрасының профессоры, филология ғылымдарының кандидаты Алматай Жүсіпова таныстырды.
Ал «Құқықтану», «Халықаралық құқық» білім беру бағдарламалары туралы Азаматтық құқық және іс жүргізу кафедрасының аға оқытушысы, заң ғылымдарының магистрі Сәуле Демежанова айтып берді.
Психология кафедрасының доценті, педагогика ғылымдарының кандидаты Ләззат Ордабаева «Психология» білім беру бағдарламасы туралы айтты.
Содан кейін сөз Экономика және қаржы кафедрасының доценті, экономика ғылымдарының кандидаты Гүлнар Майкоповаға берілді. Гүлнар Сүйіндікқызы оқушылар назарына «Экономика», «Қаржы», «Құқық және экономика негіздері» білім беру бағдарламаларын ұсынды.
Осыдан кейін мектеп оқушыларына бухгалтерлік есеп және басқару кафедрасының білім беру бағдарламалары жайында кафедра меңгерушісі, PhD докторы Айдар Байкин ақпарат берді.
Сонымен қатар спикерлер өз презентациялары барысында әр мамандықтың қызмет бағыттары және қандай ұйымдарда тәжірибеден өтуге болатындары туралы ақпарат берді.
Кездесу соңында білім алушыларға жүргізіліп жатқан тәрбие жұмыстары туралы, студенттердің әлеуметтік, қызыққа толы күнделікті өмірі жайлы айтылды. Сондай-ақ гранттар, түрлі жеңілдіктер туралы ақпарат берілді.
