Мамандық таңдау – жауапты істердің бірі. Мектеп қабырғасынан ұшқалы отырған жасөспірімдер мамандық таңдауда бағыт-бағдарды қажет етеді. Осы орайда жоғары оқу орындары өткізетін мамандыққа бейімдеу іс-шаралары түлектер үшін өзекті екені анық. Ашық есік күні – жоғары оқу орны жайлы толық ақпарат беріп, мәні мен маңызын танытатын іс-шара. Он төртінші сәуір күні Ахмет Байтұрсынов атындағы Қостанай өңірлік университетінде журналистика және коммуникациялық менеджмент кафедрасы Ашық есік күнін өткізді. Былтырдан бері карантин талаптарына сай шектеулерге байланысты біраз іс-шараларды өткізу форматы өзгергені рас. Уақыт талабына сай ұйымдастырушылар Ашық есік күнін онлайн форматта өткізді. Іс-шара аясында оқушылар мен олардың ата-аналары тікелей эфирде «Журналистика» білім беру бағдарламасы туралы толыққанды ақпарат алды: оқуға түсу және шығармашылық емтихан тапсыру ережелері, ҰБТ тапсырудағы ерекшеліктер, мамандық бойынша жұмысқа орналасу деңгейі. Әлеуметтік желілер еркін пікір алмасуға арналған диалог алаңы болды. Кафедра мерейтойына орай үздік логотип, үздік пікір жазу конкурстары ұйымдастырылған болатын. Ең белсенді қатысушы Балауса Құлабаева әлеуметтік желідегі үздік пікір иесі ретінде танылып, мереке ұйымдастырушылар атынан сыйлыққа ие болды. Аталмыш іс-шараға Қостанай облысының ауылдық, аудандық, қалалық мектептері қатысты.
Тікелей эфирде өткен Ашық есік күні журналистика және коммуникациялық менеджмент кафедрасының жиырма бес жылдығына арналды. Осы жылдар ішінде университет қабырғасынан талай талантты журналистер білім алып шықты, бүгінде олар өңірлік деңгейде ғана емес, сондай-ақ республикалық және шетелдік бұқаралық ақпарат құралдарында қызмет атқаруда. Осы мерекеде түлектер өздері білім аған оқу ордасын мерейтойымен құттықтап, болашақ студенттерге өз кеңестерін берді. «Хабар» телеарнасының «Жеті күн» бағдарламасының редакторы Дархан Абдуахит (Қастеров), «Хабар» арнасының тілшісі Гүлжан Марқабаева, «Абай» телеарнасының бас продюссері Гаухар Төлекбаева, «Қазақстан» ұлттық телеарнасындағы «Мәселе» бағдарламасының тілшісі Азамат Нұғыманов, Әзірбайжан Республикасының бірінші спутниктік «СВС» телеарнасының халықаралық жаңалықтар және авторлық бағдарламалар бөлімінің бас редакторы Мехрибан Касумова, өңірлік «Костанайские новости» газетінің бас редакторы Олег Гурский сынды түлектер кафедраны мерейтойымен құттықтап, жүрекжарды лебіздерін білдірді.
Кең ауқымды шараны журналистика және коммуникациялық менеджмент кафедрасының оқытушылары кафедра меңгерушісі Амангелді Шурентаевтың басшылығымен өткізді.
