27-28 ақпан күндері Ахмет Байтұрсынов атындағы Қостанай өңірлік университетінде Ә.Бөкейхановтың 155 - жылдығына орай «Алаш партиясының көшбасшысы» атты дәстүрлі республикалық пікірсайыс турнирі өткізілді. Турнирдің ашылу салтанатында ҚӨУ-нің тәрбие жұмысы жөніндегі проректордың міндетін атқарушы Азамат Исабаев алғы сөз айтты, «Ахмет Ұрпақтары» пікірсайыс клубының түлегі, экс-президенті Рауан Карамурзин барлық қатысушыларға сәттілік тіледі.
Республикалық турнирде Павлодар, Орал, Қарағанды, Ақтөбе және Қостанай қалаларының командалары бақ сынасты. Барлығы тоғыз университ қатысты. Үздік спикерлерден құралған қазақ лигасының 16 фракциясы мен 32 спикері жақсы өнер көрсетті.
Төрешілер құрамында «Ахмет Ұрпақтары» пікірсайыс клубының қалалық, облыстық және республикалық турнирлерінің жеңімпаздары болды.
Тартысты өткен республикалық пікірсайыс турнирінің қорытындысы бойынша ерекше ойын үлгісін көрсетіп, жоғары нәтижеге жеткен пікірсайысшыларға А.Байтұрсынов атындағы Қостанай өңірлік университеті ректорының арнайы жүлдесі, ақшалай сыйлық табысталды.
Жүлделі І –орынды Қарағанды қаласынан келген Қазтұтынуодағы Қарағанды университетінің «Тоққа салынған айыппұл» фракциясы иеленді.
ІІ дәрежелі дипломмен Павлодар қаласының С.Торайғыров атындағы университетінің "Президент А" фракциясы марапатталды,
ІІІ дәрежелі диплом Қарағанды қаласының Е.А. Бөкетов атындағы университетінің "Ө" фракциясына бұйырды.
Республикалық пікір сайыс турнирінің «Үздік спикер» номинациясына Ақтөбе қаласы, Қ.Жұбанов университетінің «Парасат майданы» дебаттық клубының пікірсайысшысы Жәкен Нүркен лайық деп танылды.
