Қостанай қаласының мәдениет және тілдерді дамыту бөлімі мен AITU шет тілдер мектебі үш тілді меңгерген жастар арасында «Тіл шебері» байқауын өткізді.
Байқау үш тілді - қазақ, орыс және ағылшын тілдерін жетік білетін дарынды жастарды қолдауға, сөйлеу мәдениетін көтеруге, мемлекеттік тілді қолданудың беделін арттыруға, жастар арасында тілді меңгеру деңгейін анықтауға бағытталған, көптілділіктің іскерлік және халықаралық қатынас ретіндегі рөлін айқындау және «Тілдердің үштұғырлығы» мәдени жобасын насихаттау, қазақстандық рухани бірлікті нығайту, тілдік қатынастар мәдениетін қалыптастыру, жан-жақты дамыған, бәсекеге қабілетті, көптілді тұлғаны тәрбиелеу.
Байқауға ұлты, мамандығы, кәсібі мен қызмет түрі әр түрлі 18 бен 29 жас аралығындағы 12 сайыскер қатысты. Олардың арасында А.Байтұрсынов атындағы ҚӨУ, Әл-Фараби атындағы ҚазҰУ, Назарбаев Университеті, Болгариядағы Америка Университеті сияқты жергілікті, қазақстандық және шетелдік жоғары оқу орындарының студенттері бар.
Байқауға қатысушылар 3 тапсырма орындады:
Self-presentation кезеңінде әр қатысушыға өздері туралы (білімі, жұмысы, хоббиі және т.б.), сондай-ақ заманауи Қазақстандағы үштілділік туралы айтуға үш минут уақыт берілді.
Үш тілдегі викторина байқауында қатысушылар сұрақтарға орыс, қазақ және ағылшын тілдерінде жауап берді.
«Қазақстанның тәуелсіздігіне 30 жыл» тақырыбындағы блиц-сауалнама: қатысушылар тәуелсіз Қазақстан тарихындағы маңызды оқиғалар туралы сұрақтарға жауап берді, сұрақтар әр түрлі тілдерде қойылды.
Қатысушылардың шығармашылығын бағалау кезінде мазмұны, жауаптардың сапасы мен ерекшелігі, тапқырлығы, үш тілде орфоэпиялық, лексикалық және грамматикалық нормалардың сақталуы, сонымен қатар сахна мәдениеті ескерілді.
2 орынды А.Байтұрсынов атындағы ҚӨУ-нің «Шетел филологиясы» мамандығының 3 курс студенті Гауһар Рүстемқызы иеленді. Мәдениет бөлімі Гауһарға 15 мың теңге көлемінде сыйақы табыстады. «Аударма ісі» мамандығының 2 курс студенті Раушан Әнуарбекова мен «Шетел филологиясы» мамандығының 1 курс студенті Аяжан Серғазина ынталандыру сыйлығын, әрқайсысы 4,5 мың теңгеден алды.
