А.Байтұрсынов атындағы Қостанай өңірлік университетінде «Қазіргі жағдайдағы білім, ғылым және бизнес интеграциясы» атты халықаралық ғылыми-тәжірибелік онлайн-конференция өтті. Конференция Қазақстан Республикасы Тәуелсіздігінің 30 жылдығы, профессор Петр Иосифович Чужиновтың туғанына 95 жыл толуына және Ұлттық валюта күніне орайластырылып ұйымдастырылды. Пленарлық отырыста серіктестеріміз – екінші деңгейлі банктердің басшылары, қазақстандық және шетелдік әріптестеріміз сөз сөйледі:
- Сәбит Исмұратов – экономика ғылымдарының докторы, профессор, М.Дулатов атындағы Қостанай инженерлік-экономикалық университетінің президенті;
- Михаль Лоштак – Чехияның (Прага қаласы) жаратылыстану ғылымдары университетінің бірінші проректоры, экономика ғылымдарының докторы, профессор;
- Эржэна Имескенова – ауыл шаруашылығы ғылымдарының кандидаты, В.Р.Филиппов атындағы Бурят мемлекеттік ауыл шаруашылығы академиясының оқу және тәрбие жұмысы жөніндегі проректоры;
- Александр Семин – экономика ғылымдарының докторы, Ресей ғылым академиясының академигі, Ресей жаратылыстану ғылымдары академиясының академигі, МААО-ның мүшесі (академигі), профессор, РФ-ның еңбек сіңірген ғылым қайраткері, еңбек сіңірген экономисі, ғылым және техниканың құрметті қайраткері;
- Ольга Мишулина – экономика ғылымдарының докторы, профессор, Челябі мемлекеттік университетінің Қостанай филиалындағы экономика кафедрасының меңгерушісі.
Тәуелсіздік алған аз ғана уақыт ішінде Қазақстан әлемдегі қарқынды дамып келе жатқан және бәсекеге қабілетті 50 елдің қатарынан лайықты орын алды. Трансформацияға бағытталған бірқатар реформалар жүзеге асырылды, атап айтар болсақ: орталықтандырылған жоспарлы экономикадан қазіргі заманғы еркін нарықтық жүйеге, басқарудың тоталитарлық үлгісінен көппартиялы демократияға өттік.
Соңғы 30 жылда Қазақстан 186 елмен дипломатиялық қарым-қатынас орнатып, Еуразияда экономикасы қарқынды дамып келе жатқан елдердің біріне айналды және халықаралық аренадағы беделі нығая түсті. Қазақстанның жалпы ішкі өнімі 180 миллиард АҚШ долларынан асты. Тәуелсіздік алғаннан бері ол 16 есе өсті.
Аталмыш конференция тағы бір айтулы датаға – Қостанай ауыл шаруашылығы институтының бірінші ректоры, профессор Петр Иосифович Чужиновтың туғанына 95 жыл толуына арналды. Кәсіби қызмет жылдарында Петр Иосифович 60-тан астам ғылыми еңбектер, 10 брошюралар мен ұсынымдар шығарды, 2 оқу құралының және 3 оқулықтың бірлескен авторы болды. Осы жұмыстардың кейбірі конференция аясында ұйымдастырылған кітап көрмесінде қонақтарымыздың назарына ұсынылды.
П.Чужинов құрған ғылыми мектеп мәселелердің іргелі сипатымен және олардың практикалық маңыздылығымен ерекшеленді. Оның басшылығымен республикамыздың және шет елдердің бүгінгі көрнекті ғалымдары ғылымға жол тартты. Олардың кейбіреулері осы ҚӨУ-де еңбек етуде.
Бұл конференция тәжірибе алмасу және сындарлы ұсыныстар әзірлеу үшін бірегей диалог алаңы және халықаралық ынтымақтастықты кеңейтуге тамаша мүмкіндік.
