Бүгін тарих ғылымдарының докторы, әлеуметтік-гуманитарлық пәндер кафедрасының профессоры Айдар Айтмұхамбетовты Қостанай өңірлік университетінің ұжымы мерейтойымен құттықтады.
Айдар Абайұлы – облысымызға танымал Айтмұхамбетовтер әулетінен шыққан. Айдар Абайұлының атасы Ахметғали Социалистік Еңбек Ері, облыстың экономикасы мен білім саласының дамуына орасан зор үлес қосқан. Әкесі Абай Ахметғалиұлы – еңбек сіңірген ұстаз, профессор, физика-математика ғылымдарының докторы. ҚӨУ-нің ауылшаруашылық институтына Абай Ахметғалиұлының есімі берілді.
Мерейтой иесі Айдар Айтмұхамбетов – университетіміздің түлегі. Оқу орнын тәмамдағаннан бері осында қызмет етіп келеді. 2000 жылы А.Айтмұхамбетов Омбы мемлекеттік педагогикалық университетінде «Ұлттық тарих» мамандығы бойынша кандидаттық, 2010 жылы Семей мемлекеттік университетінде осы тақырыпта докторлық диссертация қорғады. Түрлі тарихи тақырыптар бойынша көптеген зерттеулердің авторы.
Ұжым атынан басқарма төрағасының міндетін атқарушы, университет ректоры Ербол Исақаев мерейтой иесін Құрмет грамотасымен құттықтап, көп жылғы еңбегі үшін «Ахмет Байтұрсынов» төсбелгісімен марапаттады. Сонымен қатар облыстық тарихи-өлкетану мұражайының директоры Үміт Әкімбаева, Қостанай облысы әкімдігінің Қоғамдық даму басқармасының саяси жұмыс бөлімінің басшысы Әсел Құлмағамбетова, Қостанай облысының мемлекеттік мұрағаты директорының орынбасары Серік Төлебаев, шетелдік ғалымдар, Айдар Абайұлының ұстаздары мен шәкірттері, әріптестері құттықтап, жылы лебіздерін білдірді.
Құрметті Айдар Абайұлы, мерейтойыңыз құтты болсын! Сізге ұзақ ғұмыр, зор денсаулық, қойылған мақсаттарды іске асыруға шабыт, жігер, еңбегіңізді бағалар шәкірт тілейміз! Ғылымға қосар үлесіңіз көп болсын!
