Наурыз — жаңа өмірдің бастауы, бейбітшілік пен көктем мерекесі, жыл басы. Апта бойы университетте түрлі іс-шаралар, спорттық жарыстар, мерекелік концерттер өтті. Барлық институттарда ұлттық тағамдардан мерекелік дастархан жайылды, зияткерлік ойындардан сайыстар ұйымдастырылды.
Бүгін бас ғимараттың фойесінде студенттер мен оқытушыларды ұлттық киім киген Экономика және құқық институтының студенттері қарсы алып, бауырсақ пен тәтті тағамдардан дәм татқызды. Сонымен қатар институт студенттері мен оқытушылары акт залында мерекелік концерт қойды және «Бір шаңырақ астында» бағдарламасын ұсынды, онда олар бауырлас халықтардың: қырғыз, татар, украин, өзбек, түрік және шешендердің, ирландтықтардың ұлттық тағамдарын, киімдерін көрсетті.
А.Айтмұхамбетов атындағы инженерлік-техникалық институт қабырғасында «Армысың, Әз Наурыз» мерекелік концерті, ұлттық спорт түрлерінен спорттық жарыстар және институттың ата-анасы жоқ студенттеріне көмек көрсету мақсатында қайырымдылық жәрмеңкесі өтті және ұлттық тағамдар мен мерекелік наурыз көже ұсынылды.
Ө.Сұлтанғазин атындағы педагогикалық институтта театрландырылған концерт қойылып, студенттер қазақтың ұлттық салт-дәстүрлері мен әдет-ғұрыптарын көрсетті.
В.Двуреченский атындағы ауыл шаруашылығы институтында қабырға газеттері байқауы мен ұлттық тағамдар жәрмеңкесі өтті. Институт директорлары студенттер мен оқытушыларды көктемнің басты мерекесі – Наурыз мейрамымен құттықтады. Сонымен қатар, ең белсенді дегендері грамоталармен, сыйлықтармен марапатталды.
