Ұлы ұстаз Ахмет Байтұрсынұлының туғанына 150 жыл толуына орай ұйымдастырылған «А.Байтұрсынұлы – сан қырлы тұлға» атты байқаудың қорытындысы шығарылды.
Бірінші кезеңде «Алаш ардақтысы – Ахмет Байтұрсынұлы» атты жыр мүшәйрасы өтті. Жыр сайысына университеттің барлық мамандықтарының студенттері қатысып, А.Байтұрсынұлының бір шығармасын нақышына келтіріп, жатқа айтып беру керек болды. Екінші кезеңде сайыскерлер қоғам қайраткерінің өмірі мен шығармашылығы туралы танымдық викторинаға қатысты.
«А.Байтұрсынұлы – сан қырлы тұлға» байқауының аясында бейнелеу өнерінен де сайыс өтті. Студенттер екі бағытта өз жұмыстарын ұсынды: «бейнелеу өнері» және «мүсін» түрінде. Барлық жұмыстар акт залының фойесіне, көрмеге қойылды. Ал «Өнер» студиясының шәкірттері А.Байтұрсынұлының шығармаларына вокалдық нөмірлер дайындады. А.Байтұрсынұлының жұбайы Бәдрисафаның есімі берілген хореографиялық ансамбл «Қызғалдақтар» биін, аспаптық ансамбль «Шабыт» «Арман» күйін орындады.
Байқау қорытындысы шығарылған шығармашылық кешке қонағымыз, облыстық филармонияның солисі Азамат Мұқатов та қатысты.
Шығармашылық кештің барлық қатысушылары мақтау қағаздарымен және алғыс хаттармен марапатталды.
