А.Байтұрсынов атындағы ҚӨУ-де дәстүрлі «Студенттік таланттар фестивалі» бірінші курс студенттері қатарына өту рәсімі өтті. Биыл студенттер контингенті 2700 адаммен толықты.
Студенттер қатарына өту рәсімі – оқу орны үшін маңызды дәстүр. Бұл әрбір бірінші курс студентінің өміріндегі маңызды және ұмытылмас оқиға, жүздеген бозбалалар мен бойжеткендер ересек өмірге жолдама алады.
Университет ректоры мен әкімшілігі атынан тәрбие ісі жөніндегі проректор Азамат Исабаев бірінші курс студенттерін құттықтап, студенттерге оқуда үздік және жан-жақты болыңдар деп тілек білдірді.
Салтанатты іс-шарада студенттер өздерін әр қырынан көрсете білді. Бірі мың бұрала билесе, бірі тамылжытып ән салды, енді бірі актерлік шеберлігін көрсетті. Олар мамандық, оқу орнын таңдаудағы басымдылықтар мен қиындықтар туралы әзілдеді, ойларын білдірді.
Студенттер қатарына өту рәсімі таланттар фестивалі форматында өтті. Бірақ мұнда жеңгендер мен жеңілгендер болмады, қатысушы институттардың бәрі де мақтау қағаздарымен марапатталды. Сондай-ақ, университеттің бетке ұстар әншілері, «Іңкәр» тобы 1-курс студенттерінің алдында өнер көрсетіп, заманауи хит әнді орындады.
Іс-шара студент-жастардың көңілінен шықты!
Фотоларды университеттің ВК желісіндегі ресми парақшасына төмендегі сілтеме бойынша өтіп, жүктеп алуға болады:
https://vk.com/album-110020694_279964885
